“Asko gozatu dut erremontearekin, baina ikusi dut ezin dudala goiko mailara saltoa eman”

Aug 24, 2023

Odei Arregi (Tolosa, 30 urte) erremontistak bere azken partidua jokatuko du larunbatean Galarretan profesionaletan. 2021eko azaroan debutatu zuen Oriamendi enpresarekin eta bi urte bete aurretik beste erronka batzuk ditu aurretik. Azkenengo partidua Loitegirekin jokatuko du, Gurrutxagaren eta Zalduaren aurka. 

Bi urte eta gero erremontea utziko duzu.

Erronka bat izan zen niretzat erremontea. Pandemiak aukera eman zidan profesional izateko eta hasiera oso polita izan zen. Debutatzea lortu nuen eta oso gustora aritu nintzen urte t’erdian. Asko disfrutatu dut denbora guztian. Hala ere, ikusi dut saltoa ezin dudala eman. Maila altuagoan aritzea oso zaila da. Beste gauza batzuk ere utzi ditut erremonteagatik. Uzteko erabakia kosta egin zait hartzen, baina erabakia hartu nuen eta orain beste erronka batzuk ditut aurretik. 

Nolakoak izan dira bi urte hauek?

2021eko azaroaren 13an debutatu nuen. Balorazioa ona da. Profesionaletara iritsi naiz eta debuta oso ona izan zen. Pelotako beste modalitateetan intentsitate handiko pelotaria nintzen, erasokorra eta tantoa bilatzen nuena. Erremontean ezberdina da. Hemen eusten nuen pelotaria bihurtu nintzen. Nahiko txukun egokitu nintzen. Denak dugu gora iristeko nahi hori, baina zaila da. Boladen kirola da. Partiduak erreskadan irabazten dira, baina galdu ere bai. Oso gustora jokatu dut eta aurrera pausuak eman ditudala usten dut, baina goiko erremontistak urruti zeuden. 

Erremontean jardun eta gero gazteei gomendatzen diezu kirol hau probatzera?

Dudarik gabe. Modalitate asko jokatu ditut eta erremontea aldearekin da zailena. Erronka handi bat da. 16 urteren bueltan utzi nuen esku pelota eta ondoren herramintako beste modalitate batzutan ibili nintzen. Hor bizioak hartu nituen eta gero hori erremontean nabaritzen da eta ez dizu uzten modu egokian jokatzen. Erremontean, esku pelotan, bezala eskutik pasata jotzen da pelota. Beste modalitateetan eskura iritsi aurretik. Posturak ezberdinak dira eta eskutik zuzenean erremontera pasaz gero egokiagoa da bizioak ekidin eta postura egokiagoak hartzen diralako. Postura naturalagoa da. Egia da 28 urterekin debutatzeak lasaitasuna ematen dizula, beste ibilbide bat eta konfidantza gehiago ere bai. Erremontea desesperantea izan daiteke, baina ikasketa gune ikaragarria ere bai. Oso polita da. Probatu eta ikasi eta gero asko disfrutatzen da. 

Aldageletan nabarituko da zure hutsunea.

Nik ere nabarituko dut. Aldageletan oraindik eta gehiago disfrutatu dut. Egunero joan naiz Galarretara entrenatzera, ikustera, giroaz gozatzera eta beste erremontistak askotan galdetzen zidaten zer egiten nuen bertan. Joan eta entrenatzea ez zitzaidan batere kostatzen. Gainera oso lagunartekoa naiz. Nire izaera hori izan da. Giro hori faltan botako dut. 

Zerbait berezia egingo duzu larunbateko despedida eta gero?

Afaltzera joango gara Tolosara ingurukoak. 25en bat. Pelotako lagunak eta familiakoak. 

Juanenea finalerdietara pasa da, Ansarekin galdu arren eta Urriza kanpoan geratu da

Aug 24, 2023

Ansa II.ak 30-20 irabazi zion Juaneneari Eusko Label Torneoko ligaxkako bosgarren partidan. Emaitza honek behin betiko kanporatzen du Urriza eta finalerdietara sailkatzen du Juanenea lau punturekin. Ansa lider jarri da sailkapenean eta Barrenetxea larunbatean Urrizaren aurka 27 tantora iristen ez bada lehen finalista izango litzateke. Atzelari hernaniarrak 27 tanto behar ditu zuzenean finalera pasatzeko.
Ansa eta Juanenearen arteko partidak ez zuen emozio handirik izan, nahiz eta markagailua berdinduta mantendu zen 19nako berdinketara arte. Aurrelari urnietarraren 10-0eko partzialak 29-19 jarri zuen markagailuan. Partida 30-20koarekin itxi zen amaierara.
Juaneneak finalerdietara sailkatu zela ikusi zuen 17na jarri zenean. Agian burua lasaitu egin zen sailkatua zegoela jakinda, eta horrek lagundu egin zion Ansari, ihes erraz egin baitzuen markagailuan.
Partidak berrogei minutu iraun zuen eta gehienak 19nako berdinketara arte. Ansa gehiago menderatzen ari zen piloteoan eta nagusi zen kolpean, baina Juaneneak ondo defendatzen zuen eta batez ere saketik egindako sei tantorekin hobeto ateratzen zuen. Gainera, Ansaren bost akatsek berdinduta eramaten zuten partida.

Ansak hasieratik agindu zuen 9-6, 14-10 eta 17-14koarekin, markagailuan alde handirik egon gabe. Horrek morala ematen zion sailkapena gertu zuela ikusten zuen Juaneneari, eta arazorik gabe ziurtatu ahal izan zuen. Zangoak ere ez zion arazorik eman eta irailaren 2an jokatuko den Eusko Labeleko lehen finalerdian izango da. Bere aurkaria Ansa edo Barrenetxea izango dira.

Juaneneak min hartu du Barrenetxea IV.aren aurka 26-17 galtzen ari zenean eta Urrizari atea ireki dio

Aug 19, 2023

Zorte txarra izan zuen Aritz Juaneneak. Finalerdietara pasatzeko prest zegoen, baina Barrenetxearen aurka min hartu du 26-17 galtzen ari zenean. Emaitza honek lider uzten du Hernaniko atzelaria zortzi punturekin, Ansa bigarren dago seirekin, Juanenea lau punturekin dago eta Urriza punturik gabe. Urrizak bizirik jarraitzen du Eusko Label Txapelketan eta orain Juanenearen lesioaren bilakaeraren menpe dago.
Azken partida jokatu ezin badu, puntu bat gutxiago lortuko luke Juaneneak eta Urrizak Barrenetxeari irabaziko balio sailkapenean pasako lioke, beraz, tituluaren defendatzaileak txapelketan jarraitzeko aukera du oraindik. Urrizak Barrenetxea IV.aren aurka jokatuko du eta Ansak Juanenearen aurka, baina esandakoa itxaron egin behar da Juanenearen lesioa zenbaterainokoa den jakiteko.

Barrenetxea IV.aren eta Juanenearen arteko partidan hernaniarra izan zen nagusi, batez ere partidaren hasieran. 10-1 aurreratu zen eta saketik nagusi zen. Juanenea ezinean ari zen aurkariaren aurrean. Saldiasko atzelaria konponbide bila zebilen eta aurkitu zuen errestatzen atzean jarrita. Konfiantza gehiago hartu zuen piloteoan sartuz eta lehia berdindu zuen. Piloteoan berdintasun handiagoa zegoen, eta Juanenea zen distantzia murrizten hasi zena. Lehenengo zazpi tantora jarri zen, 13-6 eta gero sei tantora, 16-10, lau tantora hurbiltzeko, 17-13an. Barrenetxea 21-13 joan zen berriro markagailuan eta bederatzi tantoko maximoa bueltatu zuen 25-16koan. Aldea sakean eta errestoan zegoen. Barrenetxeak zazpi tanto zeramatzan saketik eta sei errestoan Juanenearen sake eta erresto bakar batengatik.

Hor heldu zen Juanenearen lesioa. Erresto batekin jarri zuen 25-17koa, baina tirakada bat sentitu zuen aiztarrean. Gero atera zuen saken, baina aldagelara joan zen Barrenetxeak 26a egin zuenean. Hankaren atzealdean izan zen, izterrean ematen duenez. Pena, eta orain denak erremontista nafarraren bilakaeraren zain daude

Ansaren garaipenak kinka larrian utzi du Urriza txapelduna

Aug 17, 2023

Urnietakoak 23 eta 30 irabazi du eta kanporatzea saihestu du

Eusko Label Txapelketako tituluaren defendatzailea, Javier Urriza, kinka larrian dago. Imanol Ansak 23 eta 30 irabazi dio gaur arratsaldean Galarretan, eta bi partidatan zero puntu lortuta, geratzen diren hiru partidetan emaitza guztiak bere alde izatea behar du. Larunbatean adibidez Juaneneak puntu bat lortzen badu eta Barrenetxeak partida irabazten badu kanporatua izango litzateke. Barrenetxeak puntu bat lortuko balu azken partidan hernaniarra puntu negatiboan utzi beharko luke.
Ansak merezimendu osoz irabazi zuen. Hasieratik bukaerara ondo jokatu zuen eta sakeko faltetan hutsune txiki bat besterik ez zuen izan. Gainerako alderdietan bikain aritu zen. Urriza presiopean irten zen eta horrek banakako berdinketatik markagailua 3-10era pasa zen Ansaren alde.
Iruñeko aurrelaria tanto bakarrera hurbildu zen, 10-11, baina Urnietako aurrelariak 11-18 markagailuan ihes egin zuen. Izan zen tanto bat Urrizari faktura pasatu ziona. 11-14an dejada batera ondo iritsi zen, baina behetik saskia sartu eta gora joan zen pilota. Hortik aurrera, zerbait deszentratuagoa ikusi zen, kantxan eroso egon gabe.
Ansak, ordea, hegan egin zuen eta zazpi tantoko aldea hamarrera pasa zuen 12-22an. Zazpi tantoraino murriztu zuen desabantaila Urrizak, 18-25, baina hor geratu zen 23-30 galdu baitzuen.
Ansak ausart jokatu zuen eta bikain aritu zen piloteoan. Zazpi tanto egin zituen saketik eta hiru falta ere egin zituen saketik. Hori bai, piloteoan huts bakarra egin zuen. Urrizak ez zuen minik egin bere pilotakadarekin eta ohi baino huts gehiago egin zituen; sei piloteoan eta bi sakearekin.
Partidak ordubete iraun zuen eta nahiz eta dirua Urrizaren alde 60 eta 100 atera, partiduak kontrakoa erakutsi zuen eta Ansa lider sei punturekin utzi du bi partidatan eta Urriza zerorekin partida bakarra falta zaionean.

Barrenetxeak lehen garaipena lortu du txapelketako partidan

Aug 12, 2023

30-27 gailendu zaio Ansari, denetarik izan duen partidan

Barrenetxea IV.ak 30-27 irabazi zion Ansa II.ari Eusko Label Torneoan zehar ikustea kostako den ikuskizunean. Pilota abiadura bizian ibili zen eta erremontistek egoera fisiko inbidiagarrian daudela erakutsi zuten. Zangoak ezin biziago ibili ziren. Atzelari hernaniarrak inoiz amore eman ez zuen Ansaren aurka bere errepertorio zabala zabaldu zuen eta erresilientzia lezioa eman zuen.
Barrenetxea zikloi bat bezala hasi zen, modu ezin hobean jokatzen, gainera zetorkion haizetearen aurrean ezinean zebilen Ansaren aurrean. Hernaniarrak ederki ateratzen, piloteatzen, defendatzen, kentzen… zuen eta joko bikain horrek 15 tantoko aldea eman zion 20-5ekoan.
Urnietako aurrelaria ez zen makurtu eta ez zuen amore eman. Partiduan sartuta jarraitu zuen eta abantaila murrizten hasi zen. 20-5etik 23-11ra pasa zen eta hortik iritsi zen norgehiagokako takadarik handiena. Ansak 23-24koa jarri zuen partidan. Meritu handiko 0-13 eta 3-19 izan zen. Ez zen izan Barrenetxeak bere prestazioak jaitsi zituenik pilotak huts eginez. Ansaren meritua izan zen guztiz.
Tornak aldatu ziren eta Ansa zen, zabaleratik aterata, Barrenetxeari min egiten ziona. Biek ala biek hamar tanto egin zituzten saketik, baina benetakoek, paretatik doazenek edo errestatzailearentzat ezinezkoak direnek. Ez zegoen inoren oparirik. 23-24an, tanto gogor eta borrokatua jokatu zuten Barrenetxearen alde erori zen.
Hor hasi zen seira partida berri bat. Barrenetxea berriro aurreratu zen 27-24, baina ezer ez zegoen erabakita, are gutxiago partida nola igaro zen ikusita. Ansa berpiztu egin zen, berriz ere, 27na berdintzeko, baina azken hiru tantoak atzelariaren alde erori ziren. 28. eta 29. tantoak bi pilotakada bikain eman ondoren iritsi ziren, eta azken tantoa txokotik zabalera ateratako sake milimetriko bat izan zen. 30-27koak partida zoragarria ixten zuen. Ikusleek txalo egiten zuten, oso gutxitan ikusten den partida ikusi zutela jakinik.
Ansak merezitako bi puntu lortu zituen, eta Barrenetxeak lau puntu. Biek merezi zuten garaipena, baina batek bakarrik irabaz zezakeen.

Juaneneak ezuztean gainditu du Urriza lehenengo partidan

Aug 10, 2023

Saldiaskoak 23-30 irabazi dio Urrizari aurkako 16-10eko markagailuari buelta emanda

Aritz Juaneneak ezustean harrapatu zituen guztiak erremonteko banakako Eusko Label Torneoko ligaxkako lehen partidan, Javier Urrizari 23-30 irabazi ondoren. Saldiaskoak garaipenaren lau puntuak eskuratu zituen eta Urriza zero punturekin geratu zen sailkapenean.
Katedrak faboritoa ematen zuen Urriza, Juaneneak markagailuan 16-10 galtzen zuen, baina 2-13ko partzial batek 18-23 aurretik jarri eta markagailua ixten asmatu zuen. Norgehiagoka amaitu bezain laster hunkitu egin zen eta zerura begiratu zuen Ainara Mariezkurrena Doneztebeko mendizalearen omenez. Juanenea hildakoaren laguna zen.
Partidak ordubete iraun zuen eta piloteo asko egon zen. Urriza kantxa asko estaltzen hasi zen eta alde txikiekin bere alde jarri zuen markagailua. 4-1, 8-4, 13-6 eta 16-10 aurreratu zen. Hortik aurrera aldatu zen partida. Urriza, seguruago ari zena, pilota gehiago huts egiten hasi zen, eta Juanenea, alderantziz, nagusitzen eta huts gutxiago egiten hasi zen. Piloteoan gainetik jarri zen, nahiz eta 16-10ekoan hankan arazoren bat izan zuela zirudien. Ez zen horrela.
16-11koa tanto piloteatua izan zen eta hortik 16-18koa ipini zuen markagailuan Saldiaseko atzelariak. 0-8ko partziala 18-23raino luzatu zen 2-13ko partzialerako. 20-25, 21-27 eta 23-30eko abantailei eutsi zien.
Partidak dominio desberdineko bi zati izan zituen arren, jokoa ez zen aldatu. Batak eta besteak jo eta eutsi jokatu zuten, eta ez zuten arriskatu. Juaneneak ez zuen jokatzeko modua aldatu, eta ez zuen ohiz kanpoko ezer egin. Joko serio eta gogorra egitera mugatu zen, bere jokoan normala den bezala. Urriza baino sendoagoa izan zen azkenean. Bigarren zatian Urrizak sei huts egin zituen. Hiru tanto egin zituen saketik Juanenearen zazpi tantoren truke. Errestoan ere Saldiaskoak egin zituen tanto gehiago. Sakearekin Iruñekoa ez zen gustura egon.
Juaneneak partida 16 eta 18an aurrez aurre jartzen zitzaiola ikusi zuenean bere konfiantzan gora egin zuen modu esponentzialean. Merezita irabazi zuen norgehiagoka Urrizaren aurka, ez baitzen ohiko konfiantzarekin aritu. Oraingoan piloteoan partida gogortzeak ez zion balio izan aurkaria gainditzeko.