Eskuin eskumuturreko lesioaren ondorioz 14 txapelketa jarraian jokatu eta gero, zazpi aldiz izan den txapelduna, baja izango da
Oriamendik txapelketa parekatua aurkeztu du Oronan bost bikoterekin. Larunbatean hasiko da txapelketa eta abenduaren 29an jokatuko da finala
52. Binakako Erremonte Txapelketa-Orona Fundazioa aurkeztu da gaur Orona Ideon eta azken orduko berri tamalgarri batekin hasi zen aurkezpena. Javier Urriza txapeldun handiak ezin izango du txapelaren defentsa egin lesio baten ondorioz. Eskuin eskumuturra ez zaio behar bezala osatu eta beste hiru astetan atseden hartu beharko du. Horren ondorioz baja da txapelketa nagusian. Erremontista nafarrak azaldu bezala, “inoiz ez nuen hutsik egin, 14 urte daramatzat profesionaletan eta urtero jokatu nuen”. Gainera zazpi aldiz izan da txapeldun, baina aurten ez da bertan izango.
Izango direnak Oriamendiko beste erremontista nagusiak izango dira. Bost bikoteetan banatuta txapelaren bila irtengo dira. Oriamendik azken orduan aldaketak egin behar izan ditu, baina bikote parekatuak osatu ditu.
Ondorengoak dira bost bikoteak: Ansa II-Juanenea, Ezkurra II-Martirena, Goikoetxea V-Barrenetxea IV, Aldabe-Azpiroz eta Segurola-Larrañaga. Txapelketa larunbatean hasiko da jokatzen eta lehenengo partiduan Segurola eta Larrañagak, Aldabe eta Azpiroz izango dituzte aurrez aurre.
Bost bikoteek ligaxka bat jokatuko dute urriaren 15a eta abenduaren 27a bitarte. Denak denen aurka ariko dira eta aurten berrikuntzekin dator ligaxka. Aurten, lehenengo sailkatuak finalerako txartela lortuko du zuzenean. Bigarren eta hirugarren sailkatuek finalerdietarako txartela lortuko dute eta azken bi bikote sailkatuak kanporatuak izango dira. Beraz, ligaxkak garrantzia irabazten du. Bigarren eta hirugarren sailkatuek finalerdia abbenduaren 24ean, Eguberri egunean, jokatuko dute eta ligaxkaren irabazlea zain izango du garailea abenduaren 29an. Azken partidu horretatik irtengo da txapelduna.
Aurkezpenan izan ziren Orona Fundaziotik Garikoitz Ameztoi, Oriamendiko Xabi González eta txapelketa jokatuko duten ia erremontista denak, baita Javier Urriza bera ere.
Hitza hartu zuten Endika Barrenetxea, Imanol Ansa eta Javier Urrizak. Barrenetxeak eta Ansak, Urrizaren lesioa deitoratu zuten. “Pena da adiskide bat eta bere mailako pelotari bat ez egotea”. Hala ere Ansak “ilusioa” ere aipatu zuen txapelketa berri baten aurrean. Pasa den urtean Urrizak eta Labakak lortu zuten txapela Ansa II-Martirenaren aurka.
27-30 gainditu du lan asko eman dio Barrenetxea borrokalaria
Javier Urriza iruindarrak bere legenda handitzen jarraitzen du eta Kutxabank Torneoko zortzigarren txapela jantzi du. Iruindarra azken hamaika urteetako txapeldun handia da, hamaika final jarraian jokatu ditu eta zortzi irabazi ditu, hiru porrotekin. Horietako bi Barrenetxea IV.aren aurka gertatu ziren, finalean berriro ere estualdian jarri zuelarik. Atzelari hernaniarrak 27-30 galdu zuen, baina irabazlea izan zitekeen. Xehetasunek erabaki zuten final parekatua eta oso gogorra. Barruan daramaten onena atera zuten. Beraien arteko lau finalak erremontearen historia handiaren parte dira.
Barrenetxeak titulua defendatzen zuen, baina aurrekoan esan bezala Urriza beti da faborito nagusia. Ordu eta 12 minutuko partidak beragandik espero zena erakutsi zuen, gogorra, berdintasun eta kalitate gorena. Denetarik izan zuen. Tanto onak, piloteo distiratsuak, jokaldiak eta sakeak alde batetik eta bestetik min handia egin zuen tarteak.
Partida parekatua hasi zen eta inork ez zuen markagailuan ihes egin. Errestoan bi pilotariek tanto asko egiten zituzten eta sakea ez zen erabakigarria. Urrizak 3-6ko errenta hartu zuen, baina Barrenetxeak partida berdindua eramatea lortu zuen, sei, zortzi, bederatzi, hamar eta hamaikara berdinduta. Barrenetxeak sakea hartu zuen pilota biziago batekin eta saketik egindako hainbat tantorekin hartu zuen aurrea 14-11. Urrizak ere pilota hori baliatu zuen 15na berdintzeko, sakearekin min eginez. Lauzpabost tantoko tartetxoa zen. Barrenetxeak lau tantoko gehieneko errenta hartu zuen, 19-15, baina Urrizak aldea ezerezean utzi zuen berriro 19-19 berdinduz. Sakea erabakigarria izan zen berriro tarte horietan batarentzat eta bestearentzat.
Azken hamarraldian finala berriro sartu zen ‘kolpeak’ trukatzeko une batean, inork ihes egin gabe. 21, 22, 23 eta 24rekin berdinduta zeuden. Partidak xehetasunen arabera erabakitzen dira askotan, eta hala gertatu zen. Edozeinek irabaz zezakeen eta biek merezi zuten, baina batek eramaten du txapela. Urrizak pilotakada handi bat eman zion 24-25ekoan eta bi pareta eder batek bi tantoko errenta txikia eman zion. Barrenetxearen 25-26koaren ondoren, falta bat heldu zen saketik, baina argia izan zen. Hurrengo tantoan zorteak irribarre egin zion nafarrari ia beheko txapa ukitzen zuen pilotakada batekin eta sake handi batek garaipenaren atarian jarri zuen, 25-29.
Barrenetxea ez zegoen oparitarako eta 27-29 hurbildu zen, baina azken tantoa, piloteatua eta borrokatua, atzean pilotakada batekin bukatu zen, eta behin betiko 27-30ekoa eta Urrizaren zortzigarren txapela iritsi zen.
Urrizak 19 tanto egin zituen piloteoan, zortzi saketik eta bi falta saketik. Akats bakarra egin zuen piloteoan, Barrenetxeak bezala: 17 tanto egin zituen piloteoan, zazpi saketik eta bi falta saketik. Jokoaren berdintasuna erakusten duten antzeko zenbakiak.
Javier Urriza pozik zegoen bere zortzigarren txapelarekin. Azken txapelketa den ala ez, ez du erabaki. “Ez dut erabakirik beroan hartu nahi. Baliteke jokatzen dudan azken txapelketa izatea, gogorra baita, baina oraindik ez dago erabakita. Ez dakit “. Garbi neukan finala zerk erabaki zuen. “Xehetasunak izan dira. Amore ez ematea, kontzentratuta jarraitzea eta tematzea funtsezkoa da. Partida espero zena izan da, oso parekatua eta oso gogorra. Azkenean egokiago aritu naizelako erabaki da. Une batzuetan ez dugu asko piloteatu, eta hor jakin izan dut partida barruan egoten eta ez irteten. Sakearekin asmatu dut lau tantotik joan denean “. Urrizak ez dio garrantzirik ematen zortzi txapel izateari. Une honetan ez diet garrantzirik ematen zenbakiei. Oso pozik nago, esfortzu handia da eta saria handia”.
Barrenetxea
“Galdu arren pozik nago egindako partiduarekin”
Nahiz eta galdu Barrenetxea “erdi irabazle” sentitzen zen. “Joko ona egin dugu. Biok oso ongi aritu gara eta horrela irabazten dizunean, dena eman eta lan ona egin denean, zoriondu besterik ez da geratzen. Gustora nago, dena eman dut eta lan ona egin dut. Nire pilotekin jokatu dugu partida guztian eta horrekmesan nahi du asmatzen dudala aukeraketan pilota onak hartzen. Pilota bat zegoen sakearekin min handia egiten zena. Nik lortu dut lau tantoko aldea, baina gero berak ere baliatu du berdintzeko partida”
Endika Barrenetxeak txapela defendatu ahal izango du Urrizaren aurka irailaren 10ean, Kutxabank Torneoko final handian. Hernaniko atzelariak 30-23 irabazi zion Ansa II.ari finalerdian eta 2020an ezin izan bazuen txapelketa finalean defendatu, oraingoan egin ahal izango du. Barrenetxeak merezimenduz irabazi zuen eta Ansa II.ak baino osoagoa izan zen finalerdian. Beti izan zen partidaren buru, hiruko berdinketan izan ezik, eta batez ere hobeto kudeatu zuen partidaren amaiera. Ez Ansak, ez Barrenetxeak ez zuten sakearekin asmatu partidan zehar, baina 27-23kotik 30-23kora hernaniarrak hiru tanto egin zituen saketik finalerdia erabakitzeko. Ordura arte sakea ez zen funtsezko faktorea izan partidan zehar. Piloteoa zen faktore desorekatzailea eta hor Barrenetxeak akats gutxiago izan zituen edo une erabakigarrietan behintzat odola hotzago izan zuen. Ansak, aldiz, hainbat akats egin zituen une garrantzitsuetan. Beharbada, 25-22koa eta 27-23koa izan ziren deigarrienak, goiko koltxoiari pilota jaurti zuenean eta aurrelari urnietarrak falta egin zuenean. Hori bai, Ansak ez zion inoiz partidari aurpegirik galdu, eta une batzuetan fisikoki aurkaria baino osoago zegoela zirudien eta markagailuan ia berdinduta zegoen18-17, 20-19 edo 23-22koan. Barrenetxea indartsu hasi zen eta 10-4, 12-6 edo 13-7 markagailuan alde egin zuen bere jokoan ia pitzadurarik izan gabe. Aurrelariak pilotakada onak konektatu zituen eta 14-12 hurbildu zen eta 16-12kotik 18-17kora pasa zen. Bi pilotariek sakean egindako akats batzuk errestoarekin txandakatu zituzten eta 23-22kora iritsi ziren. Hortik aurrera Barrenetxearen esperientzia eta tenplea nagusitu ziren. Ansak asko sufriarazi zion Barrenetxeari, asko jokatu baitzuen, eta ligaxkaren aldean hobekuntza ikusi zuen. Hernaniko atzelariak 17 tanto egin zituen piloteoan, akatsik gabe, eta zortzi tanto egin zituen saketik lau faltagatik. Era askotako sakeak atera zituen eta bi tanto egin zituen zabaletik zabalera. Ansa II.ak 16 tanto egin zituen piloteoan, bi huts egin zituen eta sakearekin hiru tanto bakarrik egin zituen hiru faltagatik. Zenbakiek ez dute engainatzen eta sakea oztopo izan zen Urnietakoarentzat.
Jaialdiko lehen partidan Urrizak baja hartu zuen eta Segurola-Azpirozek 30-20 irabazi zien Ezkurra II.a eta Juaneneari.
Urrizak 30-23 irabazi zion Juaneneari Kutxabank Torneoko ligaxkako azken partida. Iruñeko aurrelaria finalista da ligaxkako hiru partidak irabazi eta hamabi puntu lortuta. Juanenea kanporatuta geratu da bi punturekin eta garaipenik gabe. Datorren asteko finalerdia Ansak (zortzi puntu) eta Barrenetxeak (lau puntu) jokatuko dute. Ligaxka itxi zuen partida izan zen gorabehera gehien izan zuena. Juaneneak pilotakada bat jaso zuen besoan eta Urrizak min hartu zuen tiraldi baten ondorioz. Ez zuen erritmo handirik izan bi pilotariek jokatzen zutenaren ondorioz, batez ere Juaneneak. Erabaki pare batek, pasa bateak eta buelta batek, jarri zuten polemika txikia. Hasiera berdindua izan zen. 9-8koaren eta 11-8koaren ostean Urrizaren sake batek Juanenearen besoan jo eta aldageletara erretiratu zen. Besoan ubeldura zuela itzuli zen, baina ez zuen jokoan eragin handirik izan, pilota gogor jotzen jarraitu baitzuen. 12-8koaren ondoren, 15-13koa eta 18-13koa izan ziren tantorik polemikoenak. 15. tantoan, Urrizak ezker paretan eraman ezin izan zuen sake bat epaileak buelta eman eta Saldiaskoak protesta egin zuen. 18. tantoan Urrizaren sake bat, pasaren ondarrean, ontzat eman zuen epaileak eta Juaneneak ez zela ona ulertu zuen. Urrizak partida hautsi zuen eta 20-15ekoa 25-15ekoa jarri zuen. Une horretan, iruindarrak tirakada txiki bat sentitu zuen hankan eta bere burua kontrolatu zuen ez behartzeko. Partidua 29-20tik 29-23ra pasa zen eta 30-23ra. Orain Urrizak bi aste izango ditu finalerako erabat osatzeko.
Segurola-Barrenetxeak indartsuago bukatu dute
Jaialdiko lehen partidan Segurolak eta Barrenetxeak 30-24 irabazi zuten. 14ra arte Ansa eta Larrañaga jaun eta jabe izan ziren, baina partidaren bigarren zatian gorriak jaun eta jabe izan ziren. Ansak eta Larrañagak prestazioak jaitsi zituzten eta aurkariek berenak hobetu zituzten. 17na berdindu zuten eta 17-18koaren ostean 8-0eko partziala lortu zuten. Urdinek akatsak egin zituzten, eta horrek ondorioak ekarri zizkien. Gorriak seguruago agertzen dira eta horrek garaipena ekarri zien.
Ansa II.ak finalerdietarako txartela lortu du gutxienez, Barrenetxea IV.ari 23-30 irabaziz Kutxabank Torneoko ligaxkako azken jardunaldiko lehen partidan. Aurrelari urnietarrak finalera zuzenean pasatzeko aukerak ditu oraindik, baina Urriza azken partidan 17 tantora ez iristearen menpe dago. Hori bai, bigarren postua ziurtatu du zortzi punturekin. Bestalde, Barrenetxea IV.ak lau punturekin bukatu du ligaxka eta azken partidara arte itxaron behar du finalerdietarako sailkatuko den ala ez jakiteko. Juaneneak partida ez irabaztea behar du. Juanenearen garaipen batek atzelari hernaniarra kanporatuko luke. Ansa II.ak merezimendu osoz irabazi zion Barrenetxeari. Apustuetan Barrenetxearen alde atera zen dirua, baina katedrak ez zuen asmatu. Kantxa gainean gozatu zuen Ansarekin egin zuen topo, eta eroso eta konfiantzaz jokatu zuen partidaren hasieratik. Partida berdinduta mantendu zen 14nako eta 15nako berdinketara arte, baina hortik aurrera aurrelariak ihes egin zuen markagailuan 16-20, 18-23, 20-25, 21-29 eta 23-30. Urnietarra azkar ibili zen ezker pareta ondo jotzen. Zortzi tanto egin zituen saketik eta piloteoan nagusi izan zen 19 tantorekin. 19 horietatik hiru errebotekoak izan ziren, bi bi paretetako jokaldian eta lau akatsekin amaitu zuen. Barrenetxea deseroso eta piloteoan konfiantzarik gabe aritu zen. Saketik bost tanto egin zituen, hamalau piloteoan eta hiru huts egin zituen. Partidak 53 minutu iraun zuen. Barrenetxeak luze jo zuen, baina erreboteak erosoak izan ziren Ansarentzat. Ansa hobeto iritsi zen amaierara eta hobeto aritu zen piloteoan eta sakearekin lau puntuak eskuratu zituen. Garaipen hori iazko ligaxkako azken partidan ere gertatu zen.
19-30 irabazi zion Barrenetxea IV.ari eta azken partidan 17 tanto eginda finalista izango da
Urrizak 19-30 irabazi zion Barrenetxea IV.ari bigarren jardunaldiko bigarren partidan eta oin eta erdi du Kutxabank Torneoko finalean. Iruñekoak zortzi puntu ditu eta nahikoa du Juanenearen aurka 17 tanto egitea, azken partidan, finalista izateko. Barrenetxea IV.ak eta Ansa II.ak 4 puntu dituzte eta Juaneneak bi. Juanenea behartuta dago Urrizaren aurka irabaztera eta Ansa II.a edo Barrenetxea 27 tantora ez iristea kanporatua ez geratzeko. Barrenetxea eta Urrizaren arteko partidak bi zati izan zituen. Lehenengoa berdindua izan zen, baina bigarrenean Urrizak alde egin zion hernaniarrari eta nagusitasunez irabazi zuen. Dirua parean atera zen, baina Barrenetxea beheruntz joan zen 13nako berdinketaren ondoren. Lehen zatian piloteo gehiago izan zen. Bederatzinako berdinketan Barrenetxeak zabaletik zabalera sake ederra egin zuen, baina 13-12 zihoanean jokaldi bera taulara atera zitzaion eta 13nakoa izan zen. Hortik aurrera Urrizak ihes egin zuen 13-20. Iruñeako aurrelariak bere erritmoa ezarri zuen eta tantoak azkar erortzen ziren bere alde. Saketik 7 tanto egin zituen eta horietatik bost 13nako berdinketatik aurrera. Gainontzekoak ere ondo aritu ziren zenbait tanto egiten. Barrenetxeak ez zuen gozatu eta 13-20ra pasa ziren, 14-23ra, 17-27ra eta 19-30ra. Urrizak bere jokora eraman zuen partida, serio bere erritmoa ezartzen du eta ez du akatsik egiten. Gehiago eutsi zion eta ezker pareta gehiago ukitu zuen eta hori funtsezkoa izan zen bere garaipenean
Webgune honek cookieak erabiltzen ditu esperientzia hobetzeko. Nabigatzen jarraitzen baduzu, ados zaudela ulertuko dugu AjusteakOnartu
Cookien Politika
Resumen Privacidad
Webgune honek cookieak erabiltzen ditu web gunean nabigatzen ari zaren bitartean esperientzia hobetzeko. Cookie horietatik, behar bezala sailkatzen diren cookieak zure nabigatzailean gordetzen dira, funtsezkoak baitira web gunearen oinarrizko funtzio...
Beharrezko cookieak guztiz funtsezkoak dira web guneak behar bezala funtziona dezan. Kategoria honetan, web gunearen oinarrizko funtzionalitateak eta segurtasun-ezaugarriak bermatzen dituzten cookieak bakarrik sartzen dira. Cookie hauek ez dute informazio pertsonalik gordetzen.
Beharrezko ez diren cookieak dira web guneak funtziona dezan eta erabiltzailearen datu pertsonalak analisien, iragarkien eta sartutako beste eduki batzuen bidez biltzeko berariaz erabiltzen ez diren cookieak. Nahitaezkoa da erabiltzailearen baimena lortzea bere webgunean cookie hauek exekutatu aurretik.
