Finala merezimenduz irabazi zuten 40-34 Goikoetxea V.a eta Barrenetxea IV.aren aurka jendez bete zen Galarretako frontoian.
Segurolak eta Larrañagak 40 eta 34 irabazi zuten Goikoetxea V.aren eta Barrenetxea IV.aren aurka Orona Fundazioaren Binakako Erremonte Txapelketako final haundian. Bigarren txapela da Larrañagarentzat eta lehenengoa Segurolarentzat. Merezitako txapela, aurkariak baino erregularragoak izan baitziren. Oso indartsu atera ziren Larrañaga sasoiko batekin eta 8-0 eta 10-1eko partzial erabakigarri batekin aurreratu ziren. Larrañaga protagonista argia izan zen partiduaren hasieran eta erdialdera arte. Ondoren Segurolak hartu zion lekukoa. Bikote orekatu eta erregularra osatzen dute, eta beren bertute guztiak azaleratu zituzten. Urdinetan Goikoetxea ondo aritu zen, oso ondo, baina Barrenetxeak ez zuen pelota gurutzatzen asmatu eta besoa ere ez zuen askatu, ohituta dagoen bezala. Gorriek bederatzi tantoko abantailak izan zituzten; 10-1, 13-4, 29-20 eta 30-21, baina urdinek ez zuten amore eman eta finala irabazteko aukerak izan zituzten. Lau tantora hurbildu ziren 16-12, 19-15, 20-16 eta 30-26. 34-29koaren ostean partiduan bete-betean sartu ziren 34-33 eta 35-34koan. Goikoetxeak urdinei eutsi zien eta Barrenetxeak bi sake eta pelotakada on batzuk lotu zituenean partidua asko berdindu zen.
Bost tantoko azken partzial erabakigarria Hor agertu zen Segurola hiru pelotakada onekin, berriro ere lau tantoko errenta zabalduz, 38-34, eta Larrañagaren bi sakek 40-34 itxi zuten finala ordubete eta bederatzi minuturen ostean. Gorrietan, batek bere maila jaisten zuenean, besteak gora egiten zuen, eta alderantziz. Horrek abantailak mantentzea lagundu zien. Larrañagak bederatzi tanto saketik eta zazpi peloteoan eginak zituen 24-17rako. Beheko posturatik oso ondo ateratzen zuen eta pEloteoan ere pelotakada onak lortzen zituen Barrenetxea eroso ez sentiarazteko. Jokoan behera egin zuenean, Segurolak lekukoa hartu zion. Larrañagak ez zuen berriro tantorik egin azken bi sakeak egin arte, baina aurrelari gorria tantoak batzeaz arduratzen zen. Urdinetan Goikoetxeak Larrañagaren sakeak irakurtzen ikasi zuen eta pixkana urdinak hazi egin ziren. Gainera, taktika aldatu zuen aurrelari urdinak. Hasieran ez arriskatzen saiatzen zen eta errebotera jotzen zuen, baina gero gehiago arriskatu zuen eta ondo atera zitzaion. 16 tantorekin amaitu zen. Barrenetxeak ere hobera egin zuen, eta hortik etorri zen berdintasuna, baina igeri egin zuten itsasertzean hiltzeko. Segurolak partidu bikaina egin zuen 17 tanto eta hiru hutsekin. Larrañagak izan zituen zenbaki onenak, zazpi tanto egin baitzituen peloteoan eta hamaika saketik. Goikoetxeak 16 tanto egin zituen eta bi huts. Barrenetxeak sei tanto egin zituen peloteoan eta beste sei saketik. Galarretak sarrera ikusgarria izan zuen eta giro ederreko partidua eta finala jokatu ziren.
Atzo aukeratu zituzten bihar jokatu behar duten Binakako Erremonte Txapelketaren finalerako pelotak. Bikote urnietar-hernaniarra urdinez arituko da, Segurola eta Larrañagaren aurka eta pelota biziagoak aukeratu zituzten.
Binakako Erremonte Txapelketaren finala bihar ostegunean jokatuko dute Galarretan Segurola-Larrañaga eta Goikoetxea V.a-Barrenetxea IV.a bikoteek. Urnietako eta Hernaniko bikotea gogotsu dago finalerako, finalerdian Ansa eta Juanenea erraz gainditu eta gero. Hirugarren finala izango du Barrenetxeak eta lehenengoa Goikoetxeak.Atzo astelehenean, bost minutu behar izan zituen bikote bakoitzak Binakako Erremonte Txapelketako finalerako pelotak aukeratzeko. Segurola eta Larrañaga lehenengo kantxaratu ziren Galarretara eta argi zuten zer nahi zuten, jokatzeko moduko pelota bat, irteera haundirik gabekoa. 129 gramoko bi pelota bereizi zituzten, 128ko bat eta 127koa bestea. Ez dira pelota lehorrak, ezta bote baxukoak ere, baina ezta arinak eta hegaldikoak ere. Barrenetxeak min egingo duen pelota saihestu nahi zuten eta gustura geratu ziren, non aukeratu bazegoelako. Are denbora gutxiago behar izan zuten urdinek. Goikoetxeak eta Barrenetxeak finalerdiko material berdinaren aldeko apustua egin zuten. Pelota biziagoa sakearekin min egiteko. Laurak arinagoak dira, 128 gramo, 125 gramo eta 126 gramoko bi pisatu baitzuten pelotek. Aukeraketa amaitutakoan, osteguneko finalari buruz hitz egin zuten,. Jaialdia 17:30etan hasiko da, Galarretan, eta finala 18:30ak aldera jokatuko da.
Endika Barrenetxea
«Segurola eta Larrañagak jokoa eta tantoa asko lantzen dute»
«Konfiantzarekin iristen gara finalera. Lehengo larunbatean finalerdian garaipen argia eskuratu ondoren sentsazio oso onak atera genituen kantxatik. Beraz gogotsu gaude. Ansa eta Juanenearekin alderatuta oso bikote ezberdina da. Segurola eta Larrañagak jokoa eta tantoa gehiago lantzen dute, bukatzea agian gehiago kostatzen zaie, baina oso serioak dira jokatzen. Uste dut, pelota gutxi galduko dituztela, tantoa asko landu beharko dugula eta saiatuko gara gurea egiten. Gakoa beti bezala sakean egongo da. Larrañaga sakatzaile handia da eta ni saiatuko naiz min egiten sakearekin, gero Goikoetxearen hurrengo pilota aprobetxatzen saiatzeko. Kasu honetan badakigu errebotean ez dela zuloa egongo, finalerdian bezala. Saiatuko gara gauzak ahalik eta txukunena egiten. Niretzako oso berezia da, Goikoetxearen lehenengo finala izango delako eta nirekin. Hiru aldiz iritsi gara finalaurrekoetara eta ez dugu inoiz finalera sartzerik izan aurten arte. Prest gaude eta lehenengoan txapela buruan jartzen saiatuko gara»
Ander Goikoetxea
«Partidu gogorra espero dut eta irabaztea gauza haundia litzateke»
«Ondo aurkitzen naiz, konfiantzarekin aurreko larunbateko partidua eta gero. Partidu oso gogorra espero dut, Segurola eta Larrañagak ez dute pilotarik galtzen. Egia da, tantoa amaitzeko ez dutela Ansaren gaitasuna, baina partidu gogorragoa egingo digute. Finala irabazi nahi badugu ezingo dugu pilotarik apenas galdu. Tantoa luzatu egingo da eta amaitzerakoan asmatu egin beharko da. Nire lehenengo finala da eta ilusio haundia egiten dit eta gainera Barrenetxearekin. Irabaztea gauza haundia litzateke eta horrelako egun bat bizitzea polita izango da».
Iban Larrañaga
«Final irekia espero dut, baina gure burua ikusten dugu faborito»
«Ondo gaude, ilusioarekin. Momentu onean harrapatzen digu finalak eta espero dugu partidu on bat egitea eta ea txapela etxera eramaten dugun. Aurrez lanak ongi egin ditugu eta finalera sailkatu gera. Horrek ere bere arrisku puntua dauka. Bi aste egon gara txapelketako partidurik jokatu gabe, beraiek ordea larunbatean finalerdia irabazi zuten eta ikaragarrizko ilusioarekin jokatuko dute finala. Konfiantzarekin daude Ansa eta Juanenea bezalako bikote bati erraz irabazita. Guk belarriak tente eduki beharko ditugu, inongo konfiantzarik gabe eta kontzentratuta. Finala Barrenetxearen sakeak erabaki dezake. Lehengo egunean 13 tanto egin zituen eta hori ikaragarria da. Espero dut nik ere asmatzea eta errestoan ere asmatzea. Gure jokoa egin behar dugu Barrenetxearekin obsesionatu gabe, Goikoetxea ere jokoarekin dago eta Segurolak aurrean izango dituen aukerak aprobetxatu beha ditugu. Gure burua jarriko dugu faborito, ezin da beti biktima moduan joan. Bikote konpletoa osatzen dugu eta final irekia espero dut. Hau nire bigarren finala da, oran hiru urte Urrizarekin batera irabazi nuen, Matxin III.a eta Barrenetxea beraren aurka».
Beñat Segurola
«Elkarrekin hasi ginen, debuta ere elkarrekin egin genuen eta finala elkarrekin irabaztea pilota izango litzateke»
«Gogo handiarekin gaude. Jokoarekin gaude Ibai eta ni. Ea final ona egiten dugun. Hasieratik bikote bezala maila altua erakutsi dugu, ni tantoak bukatzen eta bera sakatzen. Bikote ona osatzen dugu eta txapela irabazteko aukera onak ditugu. Partidu gogorra espero dut. Barrenetxeak asko jokatzen du eta sakeari eustea garrantzitsua izango da. Sake errestoan asmatu behar dut, bestela partidua zaildu egingo zaigu. Nik faborito ikusten dut gure burua. Ligaxkan onenak izan gara, nahiz eta finala partidu batera jokatu. Binakakoan nire lehenengo finala izango da Ilusio handia egiten dit Larrañagarekin finala jokatzea. Elkarrekin hasi ginen erremontean eta elkarrekin egin genuen debuta. Polita izango zen biak batera irabaztea».
Segurolak eta Larrañagak, 18:30etik aurrera, Goikoetxea V.a eta Barrenetxea IV.aren aurka neurtuko dituzte indarrak.
Galarretan jokatuko da bihar, 17:30etik aurrera, Binakako-Orona Fundazioaren Erremonte Txapelketako finala. 18:30ean hasiko dela espero da eta Segurola-Larrañaga eta Goikoetxea V-Barrenetxea IV neurtuko dira. Final berria da eta bikote txapeldunak Urriza-Labakaren lekukoa hartuko du, azken bi edizioetako txapeldunak izan baitziren. Larrañagak eta Barrenetxeak badakite zer den txapeldun izatea. Biek Urrizarekin irabazi zuten, Barrenetxearen kasuan 2013an eta 2019an Larrañagaren kasuan. Segurola eta Goikoetxearentzat maila honetako lehen finala da eta bietako bat txapeldun bezala estreinatuko da. Bigarren finala da Larrañagarentzat eta hirugarrena Barrenetxearentzat, 2019an bigarren finala galdu zuen Matxin III.arekin, Urriza eta Larrañagaren aurka hain zuzen ere. Oso final irekia da eta ez du faboritorik. Segurolak eta Larrañagak, presioaren beldurrik gabe, faboritoen papera hartu dute, baina finalaurreko partidak eta Barrenetxearen sasoi onak faboritorik gabe utzi du finala. Baliteke urdinak katedrarako faboritoak izatea. Ligaxkan Segurola eta Larrañaga izan ziren onenak eta horrek finalerako zuzeneko txartela eman zien. Hiru partida irabazi eta bakarra galdu zuten. Azaroaren 26an bi bikote finalisten artekoan Segurola eta Larrañagak 33-40 irabazi zuten erremonte partida on batean. Aurrekari ona da, baina finala finala da. Presioa nork daraman hobeto ikusi beharko da. Funtsezkoa izango da aurrelarien errendimendua ikustea. Horrelako partidetan esperientziarik ez dutenak gako dira, eta hasieratik berotzen hastea funtsezkoa izan daiteke. Hasiera txarrek final asko markatu dituzte eta lehen helburua hori izango da, partida azkar ez galtzea. Barrenetxea eta Larrañaga sakatzaile onak dira. Hernaniarrak erakustaldia eman zuen joan den larunbatean. Tonua mantenduz gero, urdinek bide luzea egina izango dute. Segurolak funtsezko zeregina izango du errestoan. Gorriek ere min egin dezakete sakearekin eta Goikoetxearentzat partida ez da finalerdikoa bezain erosoa izango. Gainera, borrokalariagoak dira eta huts gutxi egiten dute Ansa eta Juaneneak baino. Berriz ere, behartu gabeko akatsak saihesten dituenak partida irabazteko pauso handia emango du. Batzuen eta besteen taktika ezaguna da. Urdinek sakearekin min egitearen eta Barrenetxearen kolpea aprobetxatzeko pilota biziago bat bilatzearen aldeko apustua egin dute. Gorriek ez dituzte hain pilota biziak erabiliko. Larrañaga erreboteatzaile ona da eta hor urdinek ez dute zulorik aurkituko.
Urtea Txapelduna Txapeldunordea 2010 Urriza-Etxeberria III/Zeberio II-Ion 2011 Zeberio II-Ion/Juaristi-Lizaso 2012 Urriza-Barrenetxea IV/Ezkurra-Olazar 2013 Uterga-Ion/Urriza-Endika 2014 Ezkurra-Ion/Ezkurra II San Miguel 2015 Ezkurra-Endika/Matxin III-Ion 2016 Uterga-Endika/Ezkurra II-Ion 2017 Uterga-Etxeberria III/Ezkurra II-Endika 2018 Uterga-Azpiroz/Juanenea Endika 2019 Urriza-Larrañaga/Matxin III-Barrenetxea IV 2020 Urriza-Labaka/Ansa II-Aizpuru 2021 Urriza-Labaka/Ansa II-Martirena
Barrenetxeak gidatuta Ansa II.a eta Juanenearen aurka 20-40 irabazi du bikote urdinak
Goikoetxea V.ak eta Barrenetxea IV.ak 20-40 irabazi zuten Orona Fundazioko Erremonte Txapelketako finalerdia. Partida hasi zenetik Barrenetxea IV.aren erakustaldi izugarria ikusi zen Galarretan, Ansa II.are eta Juanenearen aurka.
Atzelari hernaniarrak 25 tanto egin zituen guztira. 25 horietatik hamahiru sakez egin zituen eta partidan hasieratik bukaerara agindu zuen. Kantxan bikote bakarra egon zen Barrenetxearen lan onari esker. Bere partida gogoratzekoa izan zen.
Hasieratik bikain hasi ziren urdinak eta zazpi tantoko errenta lortu zuten 2-9koan eta hamabi tantokoa 3-15ekoan. Urdinek ez zuten hutsik egiten eta Ansa eta Juanenea ezinean ari ziren. Goikoetxeak ondo eusten zion huts egin gabe eta arriskatu gabe. Ondo zekien bere lana eta pilotak errebotera bidaltzen zituen eta hor Juanenea ez zegoen eroso. Ansa oso gutxi sartzen zen jokoan, eta egiten zuenean hotz sentitzen zen. Hala ere partida 8 eta 12 tanto arteko abantaila urdinetan egonkortu zen. Barrenetxeak lau pilota huts egin zituen ia jarraian, baina ez zuten fakturarik pasatu. Piloteoan konfiantza hartu zuenean sakeak hegan eraman zuen. Sakeak lehenengo tantotik eta 40 arteko tantora arte funtzionatu zion. Lagunak akatsik egin gabe laguntzen badu, ia gaindiezinak dira.
Takada urdinak bata bestearen atzetik zihoazen eta azken-aurrekoa behin betikoa izan zen, 15-31 aurretik jarri baitzituen. Ansak eta Juaneneak 20. tantoa egin zuten Goikoetxearen lehen hutsekin, arriskatzeko gogoz, eta 13 tantoko desabantaila, 20-33, markagailuan bikoiztu zuten urdinen azken zazpi tantoekin, 20-40.
Barrenetxeak hiru tanto egin zituen saketik, hamabi piloteoan eta lau huts bakarrik egin zituen. Goikoetxeak ondo lagundu zuen 9 tanto eta hiru akatsekin, hirurak azkenean norgehiagoka erabakita zegoenean. Gorrietan Ansak bederatzi tanto eta bi huts egin zituen eta atzean Juaneneak bi tanto egin zituen piloteoan, bat saketik eta lau huts. Atzean, Barrenetxea jaun eta jabe izan zen Juanenearen aurka.
Beraz, finala erabakita dago eta datorren larunbatean Segurolak eta Larrañagak Goikoetxea eta Barrenetxearen aurka neurtuko dituzte indarrak. Aurretik, astelehenean, 11:00etan, BINAKAKO FINALA jokatzeko materiala aukeratuko dute.
Ezkurra II.a eta Larrañagaren aurka lortutako 40-25eko garaipenak ligaxkako lehen postua eman die
Segurolak eta Larrañagak 40-25 irabazi zieten Ezkurra II.a eta Martirenari Binakako Erremonte Txapelketako ligaxkako azken partidan, eta lehen postua eman die, finalera zuzenean iritsita. Gorriek garaipena behar zuten lehenak izateko eta merezitako saria jaso zuten. Larrañaga izan zen pilotari nabarmenena. Partida bikaina jokatu zuen eta Martirena erabat menderatu zituen. Zenbaki ikusgarriekin amaitu zuen. Bederatzi tanto egin zituen saketik eta beste bederatzi piloteoan, ia akatsik egin gabe. Aurreko partidetan Segurola izan bazen nabarmenena, oraingoan atzelariak hartu zion lekukoa. Segurola eta Larrañaga ligaxkako bikote onena izan dira eta sasoiko daudela erakutsi dute. Segurolak ez du partidarik galdu azaro eta abendu osoan. Torneoaren azken fasera sasoi hobean iristen dira. Orain finalerako aurkariaren zain daude. Ansa II.ak eta Juanenea edo Goikoetxea V.a eta Barrenetxea izango dituzte aurkari. Abenduaren 24an, larunbatean jokatuko da finalerdia,. Aurretik, ostegunean, finalerdi horretarako materiala aukeratuko dute. Segurola-Larrañaga eta Ezkurra II-Martirena bikoteen arteko partidak ez zuen emoziorik izan. Seinako berdinketatik gorriek 15-9ko markagailua hautsi zuten eta abantailak pixkanaka handitu ziren urdinentzat aukerarik gabe. Martirena Larrañagak gainditu zuen, eta Ezkurra II.ak ezin izan zuen Segurola gainditu. Bost bi pareta egin zituen, baina denak partidua erabakita zegoenean. Hamaika tantotan geratu zen Segurolaren 14gatik. Irabazleek lau puntu lortu zituzten eta ligaxkako lehen postuan geratu dira 13 punturekin. Galtzaileek bat gutxiago lortu zuten eta azkenak geratu ziren hiru punturekin. Ligaxkako azken partida txapelketan ikusitakoaren isla izan zen. Orain bi partida bakarrik geratzen dira, baina txapelketako garrantzitsuenak eta onenak: finalerdia eta finala.
40-22 irabazi dute, lehen postuan jarri dira, eta galtzaileek 26 tanto baino gutxiagoan utzi behar dituzte azken jardunaldian Segurola eta Larrañaga
Ansak eta Juaneneak 40-22 irabazi zieten Ezkurra II.ari eta Martirenari Binakako Erremonte Txapelketako ligaxkako azken-aurreko jardunaldian. Emaitza honek galtzaileak kanporatzetik gertu uzten ditu eta irabazleak ligaxkako liderrak dira, partida baten faltan. Ezkurra II.ak eta Martirenak 26 tanto baino gutxiagoan utzi behar dituzte Segurola eta Larrañaga azken jardunaldian. Horrela, Segurolak eta Larrañagak puntu negatiboa izango lukete eta zortzi puntuko berdinketarekin Ezkurra II-Martirena finalerdietara sailkatuko lirateke, bien arteko lehia dela eta. Hori bai, Segurolak eta Larrañagak asko izango dute jokoan azken jardunaldi horretan, garaipen batek zuzenean sailkatuko bailieke finalera ligaxkako lehen postuan. Bestalde, Ansa II.a eta Juanenea finalerdietara sailkatuta daude gutxienez hamabi punturekin eta azken jardunaldian Segurola eta Larrañagak ez badute irabazten finalistak izango dira. Bestetik, Ezkurra II.aren eta Martirenaren puntu negatiboko porrotak zuzenean finalerdietara sailkatzen ditu Goikoetxea V eta Barrenetxea IV.a. Partidak zortzinako berdinketara arte izan zuen emozioa. Hortik aurrera, urdin itzali batzuen aurrean, gorriak nagusi izan ziren. Ezkurra II.ak eta Martirenak ez zuten euren eguna izan. Markagailua 20-10, 27-13, 34-14, 38-17 hautsi zen eta 40-22koarekin itxi zen. Ansa II.ak eta Juaneneak ia ez zuten partidu osoan huts egin. Hiru akats besterik ez zituzten egin eta Juaneneak Martirena menderatu zuen. Ansak ez zuen asko arriskatu behar izan eta abantailan jokatu zuen. Urnietako aurrelariak 15 tanto egin zituen huts bakar batengatik. Inoiz baino seguruago egon zen. Ezkurrak 14 tanto eta sei huts egin zituen. Atzeko koadroetan Juaneneak partida bikaina osatu zuen sakez egindako hiru tantorekin eta piloteoan egindako hamarrekin. Martirenak 5 tanto egin zituen sei akatsengatik.
Sailkapena 1. Ansa II-Juanenea 12 puntu 4 partida 2. Segurola-Larrañaga 9 puntu 3 partida 3. Goikoetxea V-Barrenetxea IV 9 puntu 4 partida 4. Aldabe-Azpiroz 6 puntu 4 partida 5. Ezkurra II-Martirena 4 puntu 3 partida
Webgune honek cookieak erabiltzen ditu esperientzia hobetzeko. Nabigatzen jarraitzen baduzu, ados zaudela ulertuko dugu AjusteakOnartu
Cookien Politika
Resumen Privacidad
Webgune honek cookieak erabiltzen ditu web gunean nabigatzen ari zaren bitartean esperientzia hobetzeko. Cookie horietatik, behar bezala sailkatzen diren cookieak zure nabigatzailean gordetzen dira, funtsezkoak baitira web gunearen oinarrizko funtzionaltasunetarako. Hirugarrenen cookieak ere erabiltzen ditugu, webgune hau nola erabiltzen den aztertzen eta ulertzen laguntzeko. Cookie hauek zure nabigatzailean soilik gordeko dira zure baimenarekin. Cookie hauen opt-out aukera ere baduzu. Baina cookie horietako batzuk aukeratzeak eragina izan dezake zure nabigazio-esperientzian.
Beharrezko cookieak guztiz funtsezkoak dira web guneak behar bezala funtziona dezan. Kategoria honetan, web gunearen oinarrizko funtzionalitateak eta segurtasun-ezaugarriak bermatzen dituzten cookieak bakarrik sartzen dira. Cookie hauek ez dute informazio pertsonalik gordetzen.
Beharrezko ez diren cookieak dira web guneak funtziona dezan eta erabiltzailearen datu pertsonalak analisien, iragarkien eta sartutako beste eduki batzuen bidez biltzeko berariaz erabiltzen ez diren cookieak. Nahitaezkoa da erabiltzailearen baimena lortzea bere webgunean cookie hauek exekutatu aurretik.
ekipazio ofiziala
salgai
Oriamendi 2024-2025 ekipazio ofiziala eskuragarri! 🏆✨ Pertsonaliza ezazu zure izenarekin edo jarri gogokoen duzun pilotariaren izena. Lortu zure kamiseta!
