Aldabe-Barrenetxea IV.ak eta Ezkurra II-Juaneneak garaipenarekin hasi zuten San Fermin Torneoa. Lehenengoek 30-23 irabazi zieten Urriza eta Labakari, eta bigarrenek 25-30 Ansa II-Azpirozi. Irabazleek lau puntu lortu zituzten sailkapenean eta galtzaileen artean Ezkurra II-Juaneneak bat eta Urriza-Labakak ez zuten punturik batu.
Lehen partidan Barrenetxea izan zen erremontista nabarmenena. Partidak berdintasun handia izan zuen 20-19 arte, alternatibekin. Urrizak lan handia egin zuen ordura arte, baina azken tantoetan atzelari hernaniarrak egin zuen abantaila. Aldabek abiadura eman zion pilotari, tantoak bukatzea kostatu zitzaion arren. Urrizak gogor eutsi zion, baina azkenean urdinek amore eman zuten gorrien indar erakustaldiaren aurrean.
Bigarren partidan katedrak bikote gorriaren aldeko apustua egin zuen, baina urdinek ia hasieratik gidatu zuten markagailua Juanenearen segurtasunean oinarrituta. Saldiaseko atzelaria oso seguru dabil atzealdera igaro denetik. Urdinek ekimena eraman zuten, eta erosoago irabaziko zutela zirudien arren, gorriek puntu bat berreskuratu zuten. Zapore gozoa izan zuen puntu horrek, partidua nola joan zen ikusita. Abantailak hamar tanto ingurukoak ere izan ziren partidaren fase aurreratuetan. Juanenea Azpiroz baino hobeto aritu zen, batez ere defentsan. Aurrean Ezkurrak Ansak baino tanto gehiago egin zituen, baina hutsegiteak ere egin zituen. Une erabakigarrietan Juaneneak urdinak gidatu zituen garaipenera.