Juaneneak irabazi egin behar zuen Banakako Txapelketa-Kutxabank Sari Nagusiko finalerdietako ligaxkaren hirugarren partifduan ligaxka gainditzeko itxaropena izateko, eta bere helburua bete du. 30-27 irabazi du Ansa II.aren aurka ligaxkako hirugarren partidan eta, beraz, hiru puntu ditu sailkapenean. Hori bai, laugarren postuan jarraitzen du Ansak sailkapenean lau puntu baititu bi puntu gehiago lortu ostean. Urrizak eta Barrenetxeak lau puntu dituzte partida batean.
Juanenea eta Ansaren arteko norgehiagokak alternatibak izan ditu, baina Juaneneak eraman du ekimena. Ansa II.ak huts egin du sakean, lau sake falta egin ditu, baina batez ere errestoan izan du zuloa. Saldiaseko aurrelariak kontzentratuago jokatu du eta une bakoitzean zer egiten zuen jakin du.
Ansa nagusi izan da piloteoan partidan zehar, baina denborak aurrera egin ahala Juaneneak ere egoera horri buelta ematen jakin du, eta arlo horretan parekatuta amaitu dute. Sakean izan da hobea hasieratik bukaerara arte. Hor ez du ia hutsunerik izan eta garaipena lortzeko balio izan dio.
Aurrelari nafarra hobeto sartu da partidan eta bost tantoko errenta hartu du, 8-3 eta 9-4. Ansari kosta egin zaio jokoa finkatzea, baina urduritasuna epeldu duenean bederatzira berdindu du partida. Ondoren, berdinduta joan dira eta Ansa 14-15 eta 14-16 aurretik jarri da. Bigarren berdinketa 17an iritsi da. Bazirudien Ansak pultsua hartu ziola partidari, baina orduan huts egin dio errestoak, eta 17nako berdinketatik 27-21 jarri da aurretik Juanenea. Serio eta defentsa onekin lortu du Ansa une batzuetan etsitzea.
Puntuak ezinbestekoak izan daitezke eta amaierara arte borrokan jarraitu behar da. Ansak bazekien puntu bat edo bi lortzea garrantzitsua zela eta borrokan jarraitu du. Horrek partidan sartzea ahalbidetu dio eta 27-25 eta 29-27 hurbildu da, baina erreakzioa ez da nahikoa izan. Azken tantoa Ansaren partidaren laburpena izan da eta falta bikoitza egin du 30-27rako.
Juaneneak 12 tanto egin ditu sakean eta bi falta egin ditu sakean. Ansak bost tanto egin ditu saketik, baina lau sake faltek min handia egin diote.