Endika Barrenetxeak ez zion aukerarik eman Juaneneari eta 12-30 irabazi zuen Banakako Txapelketako finalerdietako ligaxkaren bigarren partida. Horrela, atzelari hernaniarrak lau puntu ditu sailkapenean eta Saldiaseko aurrelaria minus batekin geratu da. Honela, finalerdietarako sailkapena zaildu zaio Juaneneari eta finalerako txartela zuzenean eskuratzea ezinezkoa dirudi.
Partidak oso historia gutxi izan zuen. Barrenetxearen nagusitasuna jokoaren arlo guztietan erabatekoa izan zen. Hasieratik indartsu atera zen eta abantaila handiak hartu zituen: 1-5, 2-12, 3-15, 4-23 eta 6-27. Azken tantoetan bakarrik lortu zuen Juaneneak desabantaila apur bat murriztea, eta 12-30 galdu zuen 38 minututan. 11-29a Juanenearen jokaldi trebe bat eta gero iritsi zen, eta nabarmen ospatu zuen, agian frustrazioaren ondorioz.
Zenbakiak argiak izan ziren. Barrenetxea IV.ak 18 tanto egin zituen piloteoan eta 10 saketik. Bestalde, Juaneneak bederatzi tanto egin zituen piloteoan eta hiru saketik.