Hiru bikote dagoeneko sailkatu dira final erdietara: Urriza-Martirena (Aburuza), Ezkurra II-Azpiroz (Alorrenea) eta Ansa II-Zubiri (Bereziartua)
Sagardoaren Txapelketaren lehenengo fasea amaitzeko jardunaldi bakarra falta da eta gauzak asko argitu ziren azken aurreko jardunaldian. Jabalerak Loitegi ordezkatu zuen txapelketako lehenengo partiduan eta Barrenetxearekin batera, 2-0 (15-8 eta 15-9) garaitu zituzten Ezkurra II.a eta Azpiroz. Bigarren partiduan ere Urrizak eta Martirenak 2-0 (15-11 eta 15-10) lortu zuten irabaztea Aldabe eta Juanenea bikotearen kontra. Emaitza hauekin, Aldabe eta Juanenea (Gurutzeta) kanporatuak izan dira eta hiru bikote dagoeneko sailkatuta daude finalerdietara: Urriza-Martirena (Aburuza), Ezkurra II-Azpiroz (Alorrenea) eta Ansa II-Zubiri (Bereziartua).
Laugarren eta azken sailkatua azkenengo jardunaldian erabakiko da. Jabalera-Barrenetxea (Oialume Zar) bikoteak irabazten badute, Aldabe-Juananearen aurka, sailkapena eurena izango da. Galtzen badute eta Segurola-Larrañagak (Petritegi) Ezkurra eta Azpiroz gainditzen badituzte, Petritegiko bikotea izango da sailkapena lortuko duena.
Osteguneko partidu guztiak 2-0 amaitu ziren. Jabalerak eta Barrenetxeak erraz gainditu zituzten, ordura arte lider ziren Ezkurra II.a eta Azpiroz. Lehenengo seta 15-8 erabaki zen. Jabalerak zortzi tanto egin zituen eta Barrenetxeak bost saketik. Ez zieten aukerarik eman urdinei. Bigarren setean ere gehiago izan ziren gorriak. Barrenetxeak ongi sakatzen jarraitu zuen eta lau tanto gehiago egin zituen saketik. Jabalerak maila ikaragarrian jarraitu zuen beste lau tanto gehituz. Akats bakarra egin zuen partidu osoan.
Sagardoaren Txapelketako bigarren partiduan ere gorriak, Urriza-Martirena, nagusi izan ziren (15-11, 15-10). Aurrelari iruindarrak zazpi tanto egin zituen lehenengo setean eta hamar bigarrenean. Martirena behar zenean agertu zen eta Juaneneak ezin izan zuen menderatu. Bi setak orekatuak joan ziren, hamaikana lehenengoa eta zortzina, bigarrengoa, baina azken tantoetan gehiago asmatu zuten gorriek. Batez ere Martirena oso fin aritu zen lehenengo set amaieran.
Clasificación
1. Urriza-Martirena (Aburuza) 13 puntos 4 partidos
2. Ezkurra II-Azpiroz (Alorrenea) 11 puntos 4 partidos
3. Ansa II-Zubiri (Bereziartua) 10 puntos 4 partidos
4. Loitegi-Barrenetxea IV (Oialume Zar) 8 puntos 4 partidos
5. Segurola-Larrañaga (Petritegi) 6 puntos 4 partidos
6. Aldabe-Juanenea (Gurutzeta) 0 puntos 4 partidos
Ansak eta Zubirik, Aldabe-Juanenea bikotea kinka larrian utzi dute 2-0 garaitu eta gero
Sagardoaren Txapelketan jardunaldi garrantzitsua jokatu zen ostegunean Galarretan eta emandako emaitzek sailkapena argitu dute. Urriza-Martirena (Aburuza) eta Ansa II.a-Zubiri (Bereziartua) bikoteek 2-0 garaitu zituzten Segurola-Larrañaga (Petritegi) eta Aldabe-Juanenea (Gurutzeta), hurrenez hurren. Honela, garaileek aurrera pauso garrantzitsua eman dute finalerdietara sailkatzeko eta Aldabe-Juanenea bikotea kinka larrian geratu da hiru partida eta gero punturik ez baitu sailkapenean. Orain, Urrizak eta Martirenak bederatzi puntu dituzte hiru partidatan eta Ansak eta Zubirik hamar lau partida jokatu eta gero.
Erremontari Saioko bi partidak oso hantzekoak izan ziren eta markagailua ere ia parekoa izan zen.
Lehenengo partidan Urrizak eta Martirenak 15-11 eta 15-8 garaitu zituzten Segurola eta Larrañaga. Gakoa atzelarien arteko borrokan egon zen. Martirena, Larrañaga baino hobeto aritu zen eta horrek lanak erraztu zituen. Faboritoak ziren eta pronostikoa goitik-behera bete zuten. Eroso aritu ziren, batez ere Martirenak oso ongi atera zuelako. Sei tanto egin zituen sakearekin eta Larrañagak, bakarra ere ez.
Lehenengo seta parekatuta hasi zen, baina azken tantoetan egin zuten ihes gorriek. Urrizak 14 tanto egin zituen eta ezinean aritu ziren urdinak.
Bigarren partidan 15-9 eta 15-9 irabazi zuten Ansak eta Zubirik, Aldabe eta Juanenearen aurka. Hemen ere Zubirik askoz hobeto atera zuen Juaneneak baino. Bost tanto egin zituen atzelari gorriak eta bakarra ere ez urdinak. Guztira hamaika tanto egin zituen atzelari goizuetarrak, sei lehenengo setean eta bost bigarrengoan. Akatsik ez zuen egin eta Ansak pilota asko izan zituen tantoak amaitzeko. Hamaika tanto egin zituen guztira aurrelari urnietarrak, lau lehenengoan eta zazpi bigarren jokoan.
Lehenengo setean, bosnako berdinketa eta gero, 11-5era egin zuten ihes gorriek, 15-9 amaitzeko. Bigarren jokoan hirunako berdinketatik, 12-5era joan ziren, hemen ere 15-9 irabazteko.
Arluziagak eta Zalduak ere 2-0 irabazi diete Irazu-Aiestaran VI.ari
Jaialdiko lehenengo partiduan Arluziagak eta Zalduak 15-13 eta 15-13 lortu zuten garaipena Irazu eta Aiestaranen aurka. Oso partidu berdindua izan zen bai atzean eta bai aurrean. Inork ez zuen hausten. Bi setetan 13nako berdinketarekin iritsi ziren amaierara, baina azken bi tantoak gorrien alde izan ziren.
Ansa II-Zubiri eta Segurola Larrañaga gainditu dituzte hurrenez hurren
Sagardoaren Txapelketako hirugarren jardunaldia hasi zen ostegunean Galarretan eta Loitegi-Barrenetxea IV.a (Oialume Zar) eta Ezkurra II-Azpiroz (Alorrenea) bikoteek garaipen garrantzitsuak lortu zituzten. Txapelketako lehenengo partiduan Loitegi eta Barrenetxeak 1-2 (12-15, 15-14 eta 6-8) lortu zuten garaipena Segurola eta Larrañagaren (Petritegi) aurka. Garaipen honekin Loitegik eta Barrenetxeak arnasa hartu dute sailkapenean eta finalerdietara sailkatzeko aukera guztiak mantentzen dituzte. Orain lau puntu dituzte, hiru puntu lortuta. Segurolak eta Larrañagak puntua lortu zuten eta hirugarren postuan, sei puntu dituzte sailkapenean.
Txapelketako bigarren partiduan Ezkurrak eta Azpirozek 0-2 (10-15, 13-15) irabazi zieten Ansari eta Zubiriri (Bereziartua). Beraz, garaileak finalerdietara sailkatu direla esan liteke 11 punturekin, nahiz eta matematikoki horrela ez izan. Galtzaileak sei punturekin geratu dira, bigarren postuan.
Txapelketako bi partiduak maila altukoak izan ziren eta orain arte jokatutako jardunaldi ikusgarriena izan zen.
Barrenetxeak aurrera pauso bat eman zuen. Sakearekin agindu zuen eta lehenengo setean 12-15 irabazi zuten Loitegik eta atzelari hernaniarrak. Hamabina berdinduta zeudenean bi tanto jarraian sakez zabalera egin zituen Barrenetxeak. Bost tanto sakez eta hiru piloteoan egin zituen, Loitegik ongi lagunduta. Segurolak ez zuen asko erasotu eta Larrañagak ongi defendatu arren, urdinek eraman zuten lehenengo set hori.
Bigarren jokoa oraindik eta berdinduagoa izan zen. barrenetxeak agintzen jarraitu zuen zazpi tantorekin piloteoan eta bi sakearekin. Hamalaunakoan sakearekin zabalera atera zuen baina kanpora joan zitzaion. Segurolak maila igo zuen eta norgehiagoka berdindu egin zen.
Azken set erabakigarrian bost tanto egin zituen Segurolak eta lau Barrenetxeak garaipena Loitegi eta Barrenetxearentzat izan zelarik. Tanto ederrak ikusi ziren eta jendeak asko gozatu zuen.
Ansak eta Zubirik galdu arren partidu ona jokatu zuten. Abiadura handia izan zuen lehiak. Lehenengo setean Ezkurra izan zen onena bederatzi tantorekin eta Ansa hotz hasi zen partidan. Lau tanto egin zituen lehenengo set honetan. Hala ere tanto ederrenak aurrelari urnietarrak egin zituen. Azkenean urdinek irabazi zuten lehenengo jokoa 10-15.
Bigarren setean Ansa esnatu eta Ezkurraren gainetik ere jarri zen bederatzi tantorekin. Emozioz beterik egon zen, baina azkenean Ansaren bi akatsek urdinen alde eraman zuten partidua. Partida oso azkarra izan zen eta bi aurrelariek pilotakada bortitzak jo zituzten. Atzelariak ongi defendatun zuten. Ezkurra izan zen onena 16 tanturekin eta ia akatsik egin gabe. Bi set bakarrik jokatu arren partida bikaina jokatu zuten lau pilotariek.
Jaialdiko lehenengo partiduan Gurrutxaga eta Goikoetxea VI.a nagusitu ziren. Goikoetxeak sei partidu jokatu ditu profesionaletan eta denak irabazi ditu. Gurrutxaga ere gero eta hobeto ari da jokatzen. Lau pilotariak aritu ziren bikain.
Aldabe-Juanenea (2-0) eta Loitegi-Barrenetxea IV (2-1) garaitu dituzte hurrenez hurren
Sagardoaren Txapelketako bigarren jardunaldia osatu da eta Ezkurra II-Azpiroz (Alorrenea) eta Ansa II-Zubiri (Bereziartua) lehenengo bi postuetan kokatu dira sailkapenean osteguneko jardunaldian Aldabe-Juanenea (Gurutzeta) eta Loitegi-Barrenetxea IV (Oialume Zar) gainditu eta gero, hurrenez hurren. Bitik bi garaipen lortu dituzte eta zazpi eta sei punturekin aurrera pauso haundia eman dute finalerdietara sailkatzerako bidean.
Ezkurra II eta Azpirozek 2-0 gainditu zituzten Aldabe eta Juanenea 15-9ko bi partzialekin. ezkurra izan zen lau pelotarietatik onena. Batez ere aurrelarien arteko partidua izan zen eta tanto gehienak beraiek egin zituzten. Atzelariak ez ziren jokoan asko sartu. Ezkurrak lehenengo setean bederatzi tanto egin zituen eta bigarren setean zazpi tantorekin amaitu zuen. Akats oso gutxi egin zituen eta aginte makila berak eraman zuen uneoro. Aldabek aurre egin zion lau eta sei tantorekin set bakoitzean, baina ezin izan zuen gehiago egin. Atzerlarien arteko borrokan tanto gutxi egin zituzten eta Azpirozek batez ere bigarren setean egin zituen tantoak, sei, eta lehenengo setean hiru tanto lortu zituen. Juaneneak berriz ez zuen bere eguna izan. Lehenengo setean ez zuen tantorik egin eta bigarren setean bi tanto egin zituen, beste bi akatsekin. Ezkurraren agintearekin eta Juaneneak agindu gabe atzean, 15-9koak set bakoitzean erakutsi zuen bi bikoteen artean egondako aldea. Bikote gehiago osatu zuten gorriek. Azpirozek sakearekin lau tanto ere egin zituen eta Juaneneak bakarra ere ez.
Sagardoaren Txapelketako bigarren partiduan Ansa eta Zubirik 2-1 lortu zuten garaipena, 15-7, 14-15 eta 8-1eko partzialekin. Ansa izan zen beste erremontarien gainetik aritu zena. Kolpe eta defentsa gehiagorekin Loitegi gainditu zuen aurrean. Urnietako aurrelarien arteko lehia izan zen eta Loitegi konfidantzarik gabe aritu zen. Normalean egiten dituen baino akats gehiago egin zituen. Kantxan ez zitzaion eroso ikusi. Bost akats egin zituen. Ansak berriz laguntza ona izan zuen Zubirirekin atzean. Nagusi izan ziren.
Lehenengo setean 15-7 irabazi zuten gorriek. Barrenetxea indartsu hasi zen sakearekin. Lehenengo sei tantoetatik lau egin zituen sakez eta markagailua berdinduta zijoan seina. Ezker hormatik zabalera hasi zen sakatzen eta Ansa harritu zuen. Lau tantoetatik hiru zabalera sakatuz egin zituen hernaniarrak. Urnietarra pixkana kokatzen joan zen zabalera eta agintea hartu zuen errestotik. Partziala 9-1ekoa izan zen Ansa eta Azpirozen alde eta lehenengo partziala 15-7 irabazi zuten.
Bigarren seta antzera hasi zen, gorriak agintzen eta urdinak ezinean. Ansa zen jaun eta jabe eta 11-3 aurreratu ziren. Partiduak historia gutxi izango zuela zirudien, baina orduan etorri zen urdinen erreakzioa. Gogotsu eta borrokaren bidez Barrenetxeak zortzi tanto egin zituen, horietatik hiru sakez, eta buelta eman zioten markagailuari partidua bana berdinduz. Loitegik lau tanto egin zituen bigarren set honetan. 11-3tik 12-9ra pasa ziren, 13na eta 14na berdindu zuten eta azken tantoa urdinen alde erori zen. Bigarren seteko azken tantoak izan ziren jaialdiko hoberenak. Maila haundiko erremontea ikusi zen azken tantoetan.
Hirugarren eta set erabakigarrian Ansa eta Zubiri jaun eta jabe izan ziren. Lehenengo tantoa urdinen alde erori zen, baina 8 eta 0ko partzialarekin 8-1 itxi zuten partidua gorriek. Zubiriren lehenengo akatsak ez zuen eraginik izan set honetan. Ansak lau tanto egin zituen eta merezimendu osoz eskuratu zuten garaipena urnietarrak eta goizuetarrak.
2023an hasi eta 2024an jarraipena izango duen Erremontari Herriz Herri proiektuak aukera paregabea eskainiko digu Euskal Herriko hainbat herrietara iristeko. ETBren laguntzarekin, Erremontari saioak erremontea euskal herritarren artean ezagunago egitea lortu du. Hori dela eta, erremontea beste herri batzuetara zabaldu nahi izan dugu, jendeari kirol hau modu zuzenean eta ikusgarrian ezagutzeko aukera emanez.
Proiektu honen arrakasta ikusita, aurten urrats bat gehiago eman dugu, eta, zorionez, 17 herritara zabalduko da erremontea. Hona hemen proiektua babestu eta bultzatu nahi izan duten herriak: Aizarnazabal, Bergara, Urnieta, Lekunberri, Andoain, Hondarribia, Ordizia, Altsasu, Pasaia, Zumarraga, Villabona, Hernani, Beasain, Arrasate, Zestoa, Errenteria eta Zumaia.
Aurten, herri bakoitzak bere egutegira egokituko du Erremontari Herriz Herri jaialdia, festa garaian edo herriko ekintza bereziren batean. Gure helburu nagusia erremontea zabaltzea eta jendearengana hurbiltzea izanik, jaialdiak doakoak izango dira, ezagutza prozesua errazteko asmoarekin.
Jaialdi bakoitzean bi partida jokatuko dira set formatuan. Gainera, Oriamendik herri bakoitzarekin elkarlanean, diseinu bereizgarriak eta pertsonalizatuak sortuko ditugu, komunikazioa hobetzeko.
Aurkezpen honetan, gaur hemen bildutako herriek egin duten bezala, Euskal Herriko beste herri guztiei ere animatu nahi diegu gure kulturaren zati den kirol eder hau mantentzen laguntzeko.
Benetan eskertzen diegu gaurkoan elkartu diren eragile guztiei. Zuei esker, erremonteak iaz baino osasun hobea du eta Oriamenditik esker onenak adierazten dizkizuegu.
Aurkezpenean izan dira erremontariak, 17 udaletako ordezkariak, ETBko Joseba Urkiola kirol zuzendaria, Azahara Dominguez Aldundiko Mugikortasuneko, Turismoko eta Lurralde antolaketako diputatua, Iñigo Garcia Turismo Zuzendaria eta Oriamendiko Xabi González gerentea.
Ansak eta Zubirik, Segurola eta Larrañaga gainditu dituzte, eta Loitegik eta Barrenetxeak erraz galdu dute Urriza eta Martirenaren aurka.
Sagardoaren Txapelketako bigarren jardunaldian Bereziartua eta Aburuza sagardotegiek lehenengo garaipenak lortu zituzten, Galarretan. Ansak eta Zubirik garaipena eskuratu zuten, 2-1 (7-15, 15-9, 8-6) Segurola eta Larrañaga bikotearen aurka. Beraz, Bereziartuak 3 puntu lortu zituen eta Petritegik puntu bat. Jaialdiko azken partidan, Loitegi eta Barrenetxeak (Oialume Zar) erraz galdu zuten, 2-0 (15-11, 15-7), Urriza eta Martirenaren (Aburuza) aurka. Punturik ez zuen lortu Oialume Zarrek eta lau puntu lortu zituen Aburuzak.
Txapelketako lehenengo partidan Ansak eta Zubirik partidari buelta ematea lortu zuten. Lehenengo jokoa 7-15 galdu zuten oso sendo hasi ziren Segurola eta Larrañagaren aurka. Seina tanto egin zituzten eta gorriek ez zuten lortu partidan agintzea. Bigarren setean gauzak erabat aldatu ziren. Ansa jokoan sartzen hasi zen, Zubirik Larrañagaren jokoa berdindu zuen, eta horrek agintzera eraman zituen. Jaun eta jabe izan zen Ansa bigarren setean mota guztietako tantoak eginez. Hamar lortu zituen guztira eta 15-9 berdindu zuten partida. Joko erabakigarrian Ansak berean jarraitu zuen eta zazpi tanto eginez 8-6 nagusitu ziren gorriak. Azken bi setetan 17 tanto egin zituen Ansak, partidan aginduz.
Bigarren partidan emozio gutxiago izan zen. Urrizak eta Martirenak erraz irabazi zuten 15-11 eta 15-7 Loitegi eta Barrenetxearen aurka. Urdinak ongi hasi ziren 8-10 aginduz, baina Loitegiren hiru akatsek eta Barrenetxearen beste akats batek partida irauli zuen. 14-10 jarri ziren aurretik urdinak eta 15-11 irabazi zuten. Akatsek konfidantza galdu arazi zieten gorriei, batez ere Loitegiri. Bigarren setean Urrizak agindu zuen eta ez berak eta ez Martirenak ez zuten akatsik egin. Loitegik eta Barrenetxeak 6 tanto eta 5 akats egin zituzten. Urriza izan zen partidako erremontaririk onena.
Webgune honek cookieak erabiltzen ditu esperientzia hobetzeko. Nabigatzen jarraitzen baduzu, ados zaudela ulertuko dugu AjusteakOnartu
Cookien Politika
Resumen Privacidad
Webgune honek cookieak erabiltzen ditu web gunean nabigatzen ari zaren bitartean esperientzia hobetzeko. Cookie horietatik, behar bezala sailkatzen diren cookieak zure nabigatzailean gordetzen dira, funtsezkoak baitira web gunearen oinarrizko funtzionaltasunetarako. Hirugarrenen cookieak ere erabiltzen ditugu, webgune hau nola erabiltzen den aztertzen eta ulertzen laguntzeko. Cookie hauek zure nabigatzailean soilik gordeko dira zure baimenarekin. Cookie hauen opt-out aukera ere baduzu. Baina cookie horietako batzuk aukeratzeak eragina izan dezake zure nabigazio-esperientzian.
Beharrezko cookieak guztiz funtsezkoak dira web guneak behar bezala funtziona dezan. Kategoria honetan, web gunearen oinarrizko funtzionalitateak eta segurtasun-ezaugarriak bermatzen dituzten cookieak bakarrik sartzen dira. Cookie hauek ez dute informazio pertsonalik gordetzen.
Beharrezko ez diren cookieak dira web guneak funtziona dezan eta erabiltzailearen datu pertsonalak analisien, iragarkien eta sartutako beste eduki batzuen bidez biltzeko berariaz erabiltzen ez diren cookieak. Nahitaezkoa da erabiltzailearen baimena lortzea bere webgunean cookie hauek exekutatu aurretik.
ekipazio ofiziala
salgai
Oriamendi 2024-2025 ekipazio ofiziala eskuragarri! 🏆✨ Pertsonaliza ezazu zure izenarekin edo jarri gogokoen duzun pilotariaren izena. Lortu zure kamiseta!
