Azken partidako irabazlea zuzenean pasatuko da finalera
Segurola-Barrenetxea IV.ak 1-2 irabazi diote Urriza-Larrañagari (15-12, 9-15 eta 7-8), eta azken hauek hirugarren geratu dira
Segurolak eta Barrenetxea IV.ak 1-2 (15-12, 9-15 eta 7-8) gainditu zituzten Urriza eta Larrañaga Binakako Erremonte Txapelketako-Orona Fundazioaren ligaxkako azken-aurreko partidan. Emaitza honekin irabazleak bigarren kokatu dira sailkapenean 13 punturekin Ezkurra II-Azpiroz, ligaxkako liderrarengandik puntu bakarrera. Partida bakarra geratzen da lehen faseari amaiera emateko eta azken partida Segurolak eta Barrenetxeak, Ezkurra II .aren eta Azpirozen aurka jokatuko dute. Partida horrek erabakiko du bi bikoteetatik nor igaroko den finalera zuzenean. Gainera, ez da kalkulurik egin behar, partida horretako irabazleak lehen postuan bukatuko baitu eta galtzaileak bigarren postuarekin konformatu beharko baitu. Bigarren postuan geratzen denak Urriza eta Larrañaga izango ditu aurkari abenduaren 21eko finalerdian, finalera zuzenean pasatzeko oso aukera gutxi zituztelako, eta ligaxka hirugarren postuan amaitu dutelako hamar punturekin.
Partidak emozio handia izan zuen eta batez ere abiadura bizian jokatu zen. Setak azkar joan ziren eta ez zen piloteo askoko partida izan. Hori bai, jokoa ederra izan zen. Beste behin partida ikusgarria eta maila handikoa jokatu zuten. Barrenetxea oso fresko egon zen kolpearekin eta sakearekin min handia egiten zuen. Urrizak, beti bezala, defendatu egiten zuen eta ez zuen pilotarik oparitzen. Segurolak hobera egin zuen tantoak aurrera joan ahala eta Larrañagak ere ondo jokatu zuen. Partida bikaina ikusi zen eta zaleak pozik irten ziren Galarretatik. Pena izan zen partidako azken tantoa saketik egindako falta bat izatea, baina gertatzen da partidarik onenetan amaiera ez dagoela parean.
Lehen setean Segurola eta Barrenetxea nagusi izan ziren, baina Urrizak eta Larrañagak erreakzionatu zuten eta 8-10ekotik 15-12kora pasa ziren. Barrenetxeak lau tanto ere egin zituen saketik, baina Urrizak zortzi tantorekin erantzun zion.
Bigarren seta ere antzera hasi zen. Urdinen nagusitasun hasiera baten ondoren (3-6) Urrizak eta Larrañagak erreakzionatu zuten eta 7-6 aurretik ere jarri ziren, baina oraingoan ez zen bueltarik izan eta Segurola-Barrenetxeak berriro hartu zuten agintea modu erosoan irabazteko, 9-15. Set honetan, Urriza-Larrañagak taldeko lehenak izateko aukerak matematikoki desegin ziren. Segurolak zazpi tanto ere egin zituen, bere onenean.
Set erabakigarrian Segurola eta Barrenetxea 0-4 irabazten hasi ziren, baina gorriek bosna berdindu zuten eta 5-7koaren ondoren zazpina berdindu zuten. Partida azken tantoan erabakiko zen, baina Larrañagak falta egin zuen saketik. Talka tximista bezala joan zen eta amaiera bera izan zuen.
Jabalera-Apezetxea bikoteak hobeto bukatu ditu bi setak
Jabalerak eta Apezetxeak 0-2 irabazi zieten Irazu eta Zalduari Bigarren Mailako Txapelketan (11-15 eta 13-15). Lehen seta ondo menderatu zuten, bigarrenean gorriek abantaila zuten, baina azkenean abantaila joan zitzaien eta bi hutsegitek, bata Zalduaren eta bestea Irazuren hutsek, urdinen alde itxi zuten norgehiagoka, finalerdietara sailkatuta baitaude.
Sailkapena
1. Ezkurra II-Azpiroz 14 puntu 5 partida
2. Segurola-Barrenetxea IV 13 puntu 5 partida
3. Urriza-Larrañaga 10 puntu 6 partida
4. Ansa II-Juanenea 6 puntu 6 partida