Urrizak eta Larrañagak Ansa II.a eta Azpiroz gainditu dituzte estelarrean
Galarretako atzoko jaialdiak Binakako Promozio Txapelketako ligaxka ia erabakita utzi du. Loitegik eta Eskuderok 0-2 (11-15 eta 6-15) irabazi diete Gurrutxaga eta Zubiriri, eta Goikoetxea V.ak eta Aiestaran VI.ak gauza bera (15-12 eta 15-11) egin dute Irazu eta Apezetxearekin. Emaitza hauekin Gurrutxaga eta Zubiri Binakakotik at geratu dira, Arluziaga eta Zaldua I bezalaxe.
Jaialdiko lehen partidak emozioa izan zuen lehen seteko 10nako berdinketara arte. Loitegi eta Eskudero hobera joan ziren eta 11-15 lehen seta irabazi ondoren, bigarrenean ez zuten irabazteko zailtasunik aurkitu 6-15eko markagailuarekin. Zubiri ondo hasi zen, baina ezin izan zion maila horri eutsi.
Promozio Txapelketako bigarren partidan Goikoetxea V.ak eta Aiestaran VI.ak 15-12 eta 15-11 irabazi zieten Irazu eta Apezetxeari jardunaldiko partidarik parekatuenean. Goikoetxea izan zen onena set bakoitzean zortzi tanto eginda eta Aiestaranek oso ondo atera zuen. Horrek tantoa menderatzea eragin zuen. Atzelari hernaniarrak bost eta sei tanto egin zituen set bakoitzean, hurrenez hurren. Ligaxkako azken partidan nahikoa dute set bat egitea finalera sailkatzeko.
Urrizak joko askorekin jarraitzen du
Partida nagusian Urriza eta Larrañaga Ansa II.a eta Azpirozen gainetik pasa ziren. Bi partzialetan irabazi zieten, 15-11 eta 15-4. Urrizak lau partida daramatza jarraian irabazten eta joko askorekin dago. Bederatzi tanto egin zituen lehen setean eta bost bigarrenean. Berdintasunak lehen seteko hamarreneraino bakarrik iraun zuen. Bigarren setean galtzaileek besoak jaitsi zituzten. Larrañagak Urriza entxufatuta edukitzearen ziurtasunarekin jokatu zuen eta horrek nerbioak epeltzen lagundu zion.